Óflokkað

KVARTETT SAXÓFÓNLEIKARANS SIGURÐAR FLOSASONAR OG HANS OLDING SPILA Á MÚLANUM Í KVÖLD

0

Á næstu tónleikum vordagskrár Múlans, miðvikudaginn 15. mars á Björtuloftum, 5. hæð Hörpu, kemur fram kvartett saxófónleikarans Sigurðar Flosasonar og sænska gítarleikarans Hans Olding.

Sigurður og Olding hafa starfað talsvert saman undanfarin 6 ár. Árið 2014 gáfu þeir út hljómdiskinn Projeto Brasil! með eigin útsetningum af brasilískri tónlist. Diskurinn hefur hlotið góða dóma og hljómsveitin hefur komið talsvert fram í Svíþjóð, Danmörku og á Íslandi. Nú koma þeir félagar með dagskrá frumsaminnar jazz tónlistar eftir þá báða. Meðleikarar þeirra verða bassaleikarinn Þorgrímur Jónsson og Einar Scheving sem leikur á trommur.

Tónleikarnir hefjast kl. 21:00 og fara fram á Björtuloftum, 5. hæð Hörpu og er miðaverð kr. 2000, 1000 kr. fyrir nemendur og eldri borgara, miðar fást í miðasölu Hörpu, harpa.is og tix.is

Spennandi vordagskrá Jazzklúbbsins Múlans heldur síðan áfram á miðvikudagskvöldum á Björtuloftum, Hörpu með 16 tónleikum til 17. maí. Flestir af helstu jazzleikurum þjóðarinnar koma fram í dagskránni, m.a. Björn Thoroddsen, Gunnar Þórðarson, Eyþór Gunnarsson, Tómas R. Einarsson, Sigurður Flosason, Einar Scheving, Þorgrímur Jónsson, Sunna Gunnlaugs, Erik Qvick, Ásgeir Ásgeirsson, Andrés Þór Gunnlaugsson, Scott McLemore, Ólafur Jónsson, Kjartan Valdemarsson, Haukur Gröndal og Jóel Pálsson og fleiri og fleiri.

Múlinn er að hefja sitt 21. starfsár en hann er samstarfsverkefni Félags Íslenskra Hljómlistarmanna (FÍH) og Jazzvakningar. Klúbburinn heitir í höfuðið á Jóni Múla Árnasyni sem jafnframt var heiðursfélagi og verndari Múlans. Múlinn er styrktur af Reykjavíkurborg, Tónlistarsjóðnum og SUT sjóðnum og er í samstarfi við Heimstónlistarklúbbinn og Hörpu.

Skrifaðu ummæli